عن سريلانكا .. ١٨ يوم في الجنة (الجزء الثالث)

0

اليوم التاني و التالت و الرابع:

قضيناهم كلهم في قلب سريلانكا التاريخي والثقافي، يطلق عليه  المثلث الثقافي، المكان ده فيه بالإضافة الي صخره الأسد أو سيجيريا روك الي اتكلمت عنها في المقال السابق، فيه عدد مهم من المعابد والكهوف الأثرية ومدينتين قديمتين عمرهم يقارب الألف عام.

و المكان حقيقي التجربة فيه متنوعة مش بس أثار و تاريخ و معابد لا كمان في سفاري وركوب أفيال وزياره خفيفة وجميلة لقلب قرى سريلانكا .. رحلة لعمق الثقافة والعادات والتقاليد السريلانكية القديمة .. إنت مش بس بتعرف تاريخ البلد لا بتعرف تاريخ عاداتها وتقاليدها ومأكولاتها كمان ..

ودي تفاصيل الأيام التلاته:

اليوم التاني : اتحركنا من نجومبو ووصلنا لمنطقة لسيجيريا ( الحقيقه هما ثلاث مدن صغيره جنب بعض اسمهم سيجيريا، هبرانا ودامبولا) و أنا بحجز الفنادق كنت حاسة إن الموضوع صعب و احجز فين فيهم لكن علي الواقع كل مدينة والتانية بينهم وبين بعض ربع ساعه بالعربية بس فممكن تحجز في اَي واحدة فيهم، الطريق من نجومبو أخد أربع ساعات في مناظر جميلة وأرض ممتدة سهلية علي عكس باقي الطرق الي بعد كده!

أول مكان للزيارة كان كهوف دامبولا وهي فيها معابد بوذية قديمة و المنظر من عندها جميل جداً .. لكن المشكلة الي اكتشفناها بعد طول السلالم ( علي إرتفاع عالي مش قليل تقريباً ٢٠ دقيقه صعود) إن ممنوع دخول المعابد البوذيه بأي غطاء للرأس احتراما لقدسيه المكان وده معناه ان اَي حد لابس الحجاب مينفعش يدخل المعبد .. و ده في كل المعابد، كان المتعب في الموضوع إن إحنا طلعنا مسافه طويله حقيقي .. و أما اتكلمنا مع المسؤلين ماكانوش فاهمين أوي فكره الحجاب وإن ما ينفعش حد يقلع الحجاب عشان يدخل المعبد.

و دي كانت من اللحظات الي حسّيت فيها ازاي فيه اختلافات ثقافية ودينية بين الناس .. إحنا ادباً بنلبس الحجاب ونخلع النعال عند دخول المساجد و هما أدبا و تواضعا بيشيلوا اَي حاجه علي رأسهم و في رجليهم لدخول المعبد ..

استمتعنا بالمنظر و المناقشة مع المسؤلين وبلغناهم بس إن لازم يعرفوا المسؤلين عن قطع التذاكر من تحت الجبل ان لو حد مغطي رأسه وهو بيقطع التذكره لازم يعرفوه انه مش حيقدر يدخل المعبد .. و إن دي معلومه مهمه جدا .. تفهموا و ابتسموا و مشينا.

بعد كده كان النشاط التاني حنركب فيل ونتصور الصورة الشهيرة بتاعه سريلانكا امام صخره الأسد أو سيجيريا روك ..

اَي حد ركب فيل قبل كده الركوبة دي مش حتعجبه أوي .. لأنها لمسافة قليله والفيل مش في أحسن أحواله لكن حقيقي الصورة تستاهل وهي علامه من علامات زيارتك لسريلانكا ..

اليوم التالت:

صحينا بدري واتحركنا عشان نروح المعلم الأشهر والأكثر تميزاً في سريلانكا .. صخرة الأسد أو سيجيريا روك .. الصخره في ذكر تفصيلي لها في المقال السابق، المهم إني أقوله هنا ان الزياره دي عشان تستمتع بيها حقيقي محتاجه حوالي من ٣ لـ ٤ ساعات ..

بعدها عملنا حاجة اسمها رحلة في القرية أو village tour، الرحلة دي كانت من أكتر الحاجات اللي كنت مترددة فيها لكنها في الحقيقه كانت من أظرف الحاجات الي عملناها في الرحلة ..

الرحلة دي الفكرة فيها إنك بتدخل في أعماق قرية قديمة من قري سريلانكا و بتركب فيها ٤ وسائل مواصلات مختلفة: كارتة بيجرها ثور و توك توك وعربية بيجرها موتور زرع ومركب غريبة بتمشي بيك وسط النهر مع مناظر وأصوات الغابة حواليك من كل مكان، ده كله عشان توصل لقريه صغيره في عمق الغابه فيها بيوت قديمة مبنية من الطين وحد من أهل القرية بيشرح لنا في البيت تصميم البيت والأدوات القديمة اللي بيستخدموها  للأكل و أنواع الأكل اللي بيعملوها من زمان ..

دايماً بقول البلاد والأماكن بتتعرف بناسها، زيارة البلاد مش زيارة أماكن ومعالم قد ما هي تعرف علي ثقافات وعادات وحضارات مختلفه ..

الرحلة عمرها ما بتكمل غير اما تسمع بإنصات لأهل البلد وهما بيتكلموا بفخر وانتماء عن نفسهم وأصولهم و عاداتهم وتقاليدهم ..

حلو إنك تعرف التاريخ، حلو إنك تعرف الثقافه، بس الأهم حقيقي انك تعرف البشر و تشوفهم بقلبك وعقلك ..

اليوم الرابع:

كان يوم مختلف .. بحب دايماً في الرحلات إن كل يوم يكون في أنشطة مختلفة عشان اليوم يكون مختلف .. يعني ثقافة مع ترفيه، شوبينج مع تاريخ .. و هكذا

اليوم ده روحنا تاني اقدم بلد في سريلانكا ..

المثلث الثقافي فيه أقدم بلدتين نورادهابورا  وبولوناروا. بعد مذاكرة و دراسة قررنا نروح بولوناروا لأن أطلالها في حالة أحسن وقريبة من بعض و زيارتها اسهل .. المكان جميل و تاريخي لكن لو حد مش مهتم بالتاريخ حيكون ممل جدا بالنسبة له، الفكرة بالنسبالنا كمان كانت انها مدينة عمرها ٨٠٠ سنة فقط فليست تاريخية أوي بالنسبالنا، النقطة التانية انها مشهورة بثلاث تماثيل لبوذا .. صورهم جميلة فعلاً لكن علي الواقع التماثيل صغيرة جدا ًعن المتوقع و مافيهاش تفاصيل جمالية تُذكر.

بعد أطلال بولوناروا روحنا مكان من أجمل الأماكن في سريلانكا وأكتيفتي من أشهر وأحلى الاكتيفتي اللي عملناها علي الاطلاق وهي السفاري ..

في المقال القادم حاتكلم عن أماكن السفاري في سريلانكا و ايه أحسنهم و أشهرهم و ليه ..

Tip of the day

Part of traveling is seeing the people, the locals not only the sightseeings & attractions. Always respect others cultures & believes & Open your heart when you listen to them telling their own stories

Get real time updates directly on you device, subscribe now.

اترك رد

لن يتم نشر عنوان بريدك الإلكتروني.